“Сайн аав”-ын эхнэр хүүхдүүд байрныхаа түлхүүрийг гардаж авлаа
2016 оны 12 сарын 20
 “Сайн аав”-ын эхнэр хүүхдүүд байрныхаа түлхүүрийг гардаж авлаа
Одоогоос хоёр жилийн өмнө "Хэн нэгэн” иргэний хөрөг нэвтрүүлэгт оролцсон таван хүүхдийн эцэг, таксины жолооч Т.Даваасүрэн гэгч залуугийн эгэл амьдралын өнөөгийн дүр зургийг харуулсан яриа нийтэд хүрч, олны дунд "Сайн аав" хэмээн нэрлэгдсэн.

Тэгвэл "Сайн аав" маань зуурдаар бурханы оронд одож, гэр бүлдээ нөхөж баршгүй орон зайг үлдээсэн юм.

Тухайн үед цахим ертөнцөөр маш олон хүн эмгэнэл илэрхийлж, өөрдийнхөө чадах зүйлээр ар гэрийнхэнд туслаж байсан.

Тэдний нэг нь “Шинэ Толгойт” төслийн хамт олон байсан юм. Тодруулбал, тэд талийгаачийн гэр бүлд эхний ээлжийн ашиглалтад орох орон сууцнаасаа хоёр өрөө байр бэлэглэх мэдээг дуулгаж байсан юм.

Тухайн үед олон нийтийн дунд байр бэлэглэх болсон тухайд эргэлзээ багагүй үүсч байсан.

Тэгвэл тус төслийг хэрэгжүүлж байгаа “Стандарт Проперти групп”-ийн хамт олон талийгаачийн гэргий Д.Амаржаргал болон таван хүүхдийг нь өчигдөр хүлээн авч, хоёр өрөө байрны түлхүүрийг нь албан ёсоор гардуулж өгсөн юм.

Биднийг очиход алд цэнхэр хадаг, шинэ байрны түлхүүрээ гардаж авсан “Сайн аав”-ын эхнэр, таван хүүхэд нь “22 ширхэг сонингийн хариу ийм том ирнэ гэж бодсонгүй” хэмээн баярын нулимстай зогссон бөгөөд шинэ оноос өмнө дулаан байранд нүүж орж байгаадаа баярлан, “Стандарт Проперти групп”-ийн хамт олонд талархсанаа илэрхийлж байсан юм.

Харин биднийг гарахад хүүхдүүд нь “Ээжээ одоо хурдан гэрээсээ гацуураа авч ирж засъя аа” гээд ээжийгээ тойрон гүйлдэж байгаа харагдсан бөгөөд ээж нь “Одоо энэ том байранд манай гацуур жижигдэх байхдаа” хэмээн аз жаргалтайгаар инээлдэж байсан юм.

“Сайн аав”-ын эхнэр Д.Амаржаргал:

-Байрныхаа түлхүүрийг гардаж авлаа сэтгэгдэл хэр байна?

-Сэтгэгдэл үнэхээр сайхан байна.  22 ширхэг сонингийн хариу ийм том ирнэ гэж бодсонгүй. Ханийгаа тэнгэрт үдчихээд энэ мэдээг сонсоод анх итгээгүй. Дараа байрныхаа батламжаа гардаж аваад итгэсэн. Тэрнээс хойш итгэл дүүрэн нүдээр хүүхдүүдээ харж байсан. Энэ өдрийг маш их хүлээсэн. Хүүхдүүд маань дандаа байрандаа орохоороо тэгнэ, байрандаа орохоороо ингэнэ гэж ярьдаг байсан. Хүххдүүдийн маань мөрөөдөл биелж байгаад маш их баяртай байна. “Стандарт Проперти групп”-ийн хамт олонд дахин дахин баярлалаа гэж хэлмээр байна. Гэртээ банштай цай хийгээд анх нэвтрүүлэгт орж байсан. Одоо яг тэрэндээ шинэ байрандаа банштай цайгаа хийгээд л бүгдийг нь хүлээж авна даа.

-Хэзээ байрандаа орох вэ?

-Бид нарын хүсэл матрас тавиад ч хамаагүй өнөөдөр орчихмоор байна. Гэхдээ гэр хорооллоос байр руу нүүх бас жаахан төвөгтэй. Ямар байсан сайн өдөр харж байгаад ойрын хугацаанд л орно доо.

“Стандарт Проперти групп”-ийн гүйцэтгэх захирал Г.Лхамсүрэн:

-“Сайн аав”-ын эхнэр, таван хүүхдэд өнөөдөр амласан ёсоороо байрныхан түлхүүрийг гардуулж өглөө сэтгэгдэл маш их өндөр байна. Анх “Хэн нэгэн” хөрөг нэвтрүүлгийг үзэж байхдаа 22 сонин барьчихаад гэртээ харьж чадахгүй байгаа охиныг харчихаад байгаа бүх мөнгөөрөө сонинг нь худалдаж аваад охиныг гэрт нь хүргэж өгч байгааг хараад энэ хүн хэзээ нэгэн цагт энэ сайн үйлийнхээ үр шимийг хүртэнэ гэж бодож байсан. Тэгэхээр энэ байр тэр хүний тэр сайхан сэтгэлийн хариу гэж бодож байна. Энэ байр бол манай хамт олны хөдөлмөрийн үр шим. Их олон хүний сэтгэл шингэсэн байрны түлхүүрийг гардуулж өгсөндөө баяртай байна.

Дашрамд сонирхуулахад, Олноо сайн аав гэж хүндлэгдсэн таксины жолооч Т. Даваасүрэн агсны гэгээн дурсгалд зориулан бүтээж буй “Good dad” буюу “Сайн аав" уран сайхны кино 2017 оны ихээр нээлтээ хийхээр төлөвлөж байгаа юм байна. “Простар” филмийн бүтээл болох “Сайн аав” уран сайхны киноны гол дүрд жүжигчин, найруулагч СТА С. Баттулга, Маск продакшны жүжигчин СТА Ш. Жавхлан нар тоглож байгаа аж.

Т.Гэрэл
Эх сурвалж http://www.info.mn
 “Сайн аав”-ын эхнэр хүүхдүүд байрныхаа түлхүүрийг гардаж авлаа
 “Сайн аав”-ын эхнэр хүүхдүүд байрныхаа түлхүүрийг гардаж авлаа
 “Сайн аав”-ын эхнэр хүүхдүүд байрныхаа түлхүүрийг гардаж авлаа
 “Сайн аав”-ын эхнэр хүүхдүүд байрныхаа түлхүүрийг гардаж авлаа
 “Сайн аав”-ын эхнэр хүүхдүүд байрныхаа түлхүүрийг гардаж авлаа
Таалагдвал LIKE бэлэглээрэй.

Сонирхолтой мэдээ

Сэтгэгдлийг ачаалж байна ...
топ 20 мэдээ